Voi(5) Nak Cerlian Cazual
Hringtu Pa Ni
Kan hmai June 21th, 09 ni cu hringtu Pa le ni a phan tthan cang lai. Mi cheu cu Pa le nih thih tak mi zong kan um lai. Cu lio ah Pa a ngei rih mi cu zei tluk mi van ttha dah kan si. Hringtu nu le pa he um tti lio caan ah an kan dawt nak cu tampi kan thei kho tawn lo. Lam hlat kan phanh hnu le an thih hnu tu ah an dawt nak cu duhsah in kan thinlung ah a hung pem. Tu kum hringtu pa le ni caah Pa a ngei rih mi na si ahcun zei tin dah lawmhnak na langhter lai? Hringtu pa ni cu a rak thawh keh nak in kum 99 a rau cang. A thawhkeh ning cu a tang lei bantuk in asi.
Fa le nih hringtu Pa le upat pek nak ding caah ti’n hringtu pa le ni um seh tiah ruah nak cu Spokane, khua Washington State in Sonora Smart Dodd ti mi nu nih a rak thawk. 1909 kum hringtu nu ni sermon a rak ngaih nak ah hringtu pa le ni zong um ve ding in a thin lung a rak chuak.
Sonora nih hringtu a nu thih hnu in hringtu apa William Jackson Smart nih a zohkhenh ning hna, a cawm ken ning hna le hringtu pa le nih fa le caah an in tuar ning, dawtnak an ngeih ning hna a hmuh tik ah a lung hmuih tuk i Washinton State, Spokane khua ah hringtu a pa chuah thla June 19th, 1910 kum ah a voi khat nak hringtu pa ni a rak tuah pi hna.
Cu hnu 1926 kum ah New York khua ah ram pum pi theih pi ding in hringtu pa ni committee nih an chuah pi. 1956 kum ah Congress nih an cohlang i 1972 kum ah President Richard Nixon nih June thla zarh thum nak cu hringtu pa le ni si ding in a hna tlak pi ve.
Hringtu pa ni timi cu minu pakhat nih a pa dawtnak a philh khawh lo nak in a chuak mi asi i hringtu nu ni nih a hrinsor mi asi ti zong in ti khawh asi fawn…
Cerlian Media
