Kan Theih Mi Kan Fiang Dih Tiah
Ruat Hlah
Nai hrawng cu ka holh a tam chuah chuah. Ka hmur zong a sau dom. Ka zei dek a ti hnga. Mi bia ngeih ruam kai zal lo. Ka chim deuh deuh ka palh mi a tam deuh. Ka chim deuh deuh, mi ngai chiat nak, lung fah nak le nun nuamh lo nak ka chuah pi deuh deuh. Mi kong ceih hrim te nih ka kaa aka thawt tuk. A sengh in kai sengh tleih lo mi, mi kong hna hlawptlo dom in ka ceih cu! Biaphei in chim ding zong biatung in ka chim, bianem chim le lam phei kal tiah phung thluk kan ngei nain ka kaa in bianem a chuak kho duam lo. Biahrang long te an chuak. Hruh le ngat hlei in molh le tamh i chap hi cu a poi kho tuk.
‘ Bia tam deuh kan chim poh ah tam deuh in kan sual ve ko lai, cu caah na fim ah cun bia na sum lai . ’
Phungthlukbia–10:19
‘ Na lungre a theih deuh poh ah mang chia na manh deuh ko lai. Cu bantuk in tam deuh bia na chim poh ah hruh nak bia tam deuh na chim sual ko lai. ’
Phungthlukbia–5:3
Hi ti hin Bible nih ral rin nak a kan pek ko nain. Arfa ciap in kan ciap cu! Kai chir dom i chir len zong ah zei ttha hnem lo, ka chim cang leh cu teh. Asinain hmai lei ah zei tin tal in kai siam rem kho hnga maw tiah tlawm deuh chim ttung i tam deuh ngeih he ai peh tlai mi ca le phung thluk ka kawl i cu lak i ka uar cem mi cu “ Grey Harris ” nih a chim mi hi ka duh cem. Hi hi ka zulh khawh ah cum zeimawzat cu kai remh khawh hrim hrim lai tiah ka ruah.
Minung pakhat nih bia a chim tik ah a chim duh nak le a sullam ruat hmasa lo in le fiang setsai lo buin leh colh a hmang mi kan um. Cun micheu cu bia an chim mi, ca an ttial mi fian hmasa i tim lo in zei tin dah ka leh lai tiah chizawh zu bawh in ai bawh mi kan um fon.Cun laiforum le Rungcin a rel pah mi nih cun an fiang pah men ko lai. Cu ca ah, mi chim bia fian i zuam hmasa uh sih law cu hnu ah leh hna uh sih.
Mi pakhat nih lung tho ngai in le, i biatak ngai in a chim lio ah kan theih mi le kan hngalh mi hnih chun te ka chim manh lai lo ti phun in a chim mi a dih hlan ah i thlak duk duk kan hmang ton. Bia an chim lio ah cun dai te in ngai hmasa ko uh sih. Kan chim caan a phan ve te ko lai. Dai te in um hi bia ngeih phunkhat a si ve.
Mi bia tan a hmang mi kan um ttheu. Mi pakhat nih a chim mi bia kha kan theih cia a si ahcun ui te ek chuak khi kan lo. Ka theih cia, ka hngalh cia ti phun in bia ngai duh lo bantuk, khua dang i hoi ter bantuk, lu i khun ter bantuk in kan um ton. Cu cu kan palh ton nak a si. Zei ca ah tiah ahcun kan chim mi le kan theih mi ai khat ko zong ah sullam tampi in hrilhfiah khawh asi. Phun dang in chim ahcun kong khat nih sullam tampi a ngei ca ah na theih cia le na hngalh cia an chim len zong ah an duh nak le an ruah kha tling te in a dongh tiang chim ter ko hna.
Bia kan chim lio i an kan zoh lo ahcun kan bia chim tha a tho bak lo. Nan si cio ko lai dah ka ti. Zei ca ah tiah kan bia a ngai lo tiah kan ruah hna. Bia na chim lio ah kan zoh hna seh tiah na duh bantuk in va zoh ve hna. Keimah hi ka zual khun ko rua dah ka ti. Bia nan chim lio ah vawlei i velh ter bantuk, ca dang i rel ter bantuk, hawi hlei ca rel pi bang in ka um ton. Zoh hi a bia pi tak tak. Zei ruang ah ti ahcun a zei maw caan ahcun an chim mi bia nak in an kut le an ke, an hmai i an piah mi zoh ah a fiang deuh. Bia an chim na ngeih i na theih, asinain ka fiang dih tiah va ruat hlah. Na fian lo mi a um tik ah na fiang na lo pi in va let colh hna hlah. Na fian lo nak zon te kha hi zon te hi ka fiang deuh lo tiah hal hmasa hna law an chim hnu ah va let te hna.
Minung nih tlamtlin nak a ngei mi kan um lo. Asinain i fim kaan nak le ralrinnak, cawn nak cu kan ngei kho dih. Mah chung hin nun tthinhnak cu a um dih ve. Nun tthinhnak nih minung hi man kan ngeihnak a langh ter tu pakhat asi ve. Ca ttialtu ; Thawng Peng Orginla Link: http://pccf2002.blogspot.com/search/label/Capar Cerlian Vol ( 3 ) 12th, April 2009
